18. nóvember 2026 Stofnfundur Áfallahóps Samorku Samorka boðar til stofnfundar Áfallahóps föstudaginn 27. nóvember n.k. í fundarherberginu Hóli, Húsi atvinnulífsins, frá klukkan 10:00-12.30. Tilgangur hópsins er að efla samstarf og þekkingu íslenskra orku- og veitufyrirtækja á áfallaþoli og innviðavernd. Hann á að vera vettvangur fyrir upplýsingamiðlun og sameiginlega hagsmunagæslu gagnvart stjórnvöldum og fleirum. Hópnum er einnig ætlað að vakta og hafa áhrif á innlenda löggjöf og reglur á þessu sviði auk þess að fylgjast með þróun á alþjóðavettvangi. Dagskrá fundarins: Samkeppnisréttarárétting Aðdragandi stofnunar Áfallahóps Erindisbréf og verkefni hópsins Frumvarp um almannavarnir og um einföldun reglna og flýtingu uppbyggingar – öryggi, upplýsingar og aðgangssvæði hjá raforkufyrirtækjum Alþjóðleg þróun – Norrænt samstarf – stefnumótun ESB – viðmið NATO. Næstu skref – þ.á.m. tillaga um fulltrúa í hópnum – allt að 10 talsins. Fundurinn er fyrst og fremst ætlaður þeim starfsmönnum aðildarfyrirtækja Samorku sem bera ábyrgð á áfallaþoli, innviðavernd og öryggi (security). Þeir sem áhuga hafa á að vera í áfallahópnum eru hvattir til að láta vita af því fyrir fundinn með því að senda tölvupóst á eftirfarandi: Sveinn Helgason sveinn@samorka.is, Pétur Krogh Ólafsson, Petur.Krogh.Olafsson@veitur.is og Finnur Beck finnur@samorka.is Nánari upplýsingar um fundinn, skráningu og til að taka þátt á Teams er að finna hér: Stofnfundur Áfallaráðs Samorku: Stofnfundur Áfallahóps Samorku
10. nóvember 2026 Orku- og veitustarfsemi í lykil hlutverki samkvæmt nýrri skýrslu um innviði á Reykjanesskaga Framleiðsla, flutningur og dreifing á orku, neysluvatn, vatnsöflun og fráveita eru allt mjög mikilvægir innviðir á Reykjanesskaga, samkvæmt nýrri áfangaskýrslu starfshóps innviðaráðherra. Hópnum er ætlað að greina, meta og flokka mikilvæga innviði í þessum landshluta og leggja til hvernig forgangsraða eigi mótvægisaðgerðum vegna ógna af völdum náttúruvár. Eldgosahrinan við Sundhnúkagíga, austan við Svartsengi og norðan við Grindavík, sem hófst í desember 2023 hefur valdið tjóni á lykil innviðum og kallað á umfangsmiklar aðgerðir til að verja mannvirki og aðra innviði gegn náttúruhamförum. Svartsengisvirkjun og framleiðsla á heitu vatni eru dæmi um mjög mikilvæga innviði á Reykjanesskaga og sama gildir um lykiltengivirki og meginflutningsleiðir raforku til og frá Suðurnesjum, m.a. tengivirki á Fitjum og í Hamranesi ásamt Suðurnesjalínu 1 og 2. Megininnviðir hitaveitu frá Svartsengi, þ.m.t. stofnkerfi, Njarðvíkuræð og lykilmiðlun falla líka undir skilgreiningu á mjög mikilvægum innviðum. Veruleg röskun á rekstri þeirra getur haft mjög alvarleg áhrif á skömmum tíma og takmarkaðir möguleikar eru á viðhalda sambærilegri þjónustu eftir öðrum leiðum. Skýrsluhöfundar benda á að mögulegir veikleikar innviðakerfisisins felist ekki eingöngu í ákveðnum mannvirkjum. Þeir geti líka verið til staðar í þjónustu- eða aðfangakeðjum, takmörkuðum varalausnum og því hvernig mismunandi kerfi eru háð hvort öðru. Fjarskiptakerfi þurfa t.d. raforku til að virka en raforkukerfi nýta líka fjarskipti til stjórnunar og vöktunar. Þetta skiptir máli við að meta kerfislægt áfallaþol. Í skýrslunni er bent á að náttúruvá geti haft keðjuverkandi áhrif á innviði og þau magnast eftir því sem þjónusta liggur lengur niðri. Raforka, fjarskipti og samgöngur gegna þar sérstöku hlutverki þar sem röskun þeirra getur bæði haft bein áhrif og torveldað rekstur, viðbrögð og endurheimt annarra kerfa. Næsta skref í þessu verkefni er að skilgreina og meta mótvægisaðgerðir, með hliðsjón af kostnaði, ávinningi, hvernig hægt sé að hrinda þeim í framkvæmd og líkur á að þær dragi úr áhættu fyrir samfélagið. Á þessum grunni verði hægt að forgangsraða aðgerðum eða tvinna þær saman til að styrkja áfallaþol samfélaganna á Reykjanesskaga til lengri tíma. Starfshópurinn hefur þegar átt samráð við sveitarfélög, opinberar stofnanir og rekstraraðila mikilvægra innviða á svæðinu og fyrir höndum er frekara samráð. Í hópnum áttu sæti fulltrúar innviðaráðuneytis, dómsmálaráðuneytis, umhverfis-, orku- og loftslagsráðuneytis, Almannavarnadeildar ríkislögreglustjóra, Háskóla Íslands og Veðurstofu Íslands. Hér er hægt að lesa skýrsluna í heild sinni: https://www.stjornarradid.is/efst-a-baugi/frettir/stok-frett/2026-11-09-starfshopur-um-mikilvaega-innvidi-a-reykjanesskaga-skilar-afangaskyrslu
9. nóvember 2026 Jarðhiti er stöðugur orkugjafi segir orkumálastjóri ESB Jarðhiti er stöðugur orkugjafi og aukin nýting hans til húshitunar og annarra nota er mikilvæg til að efla hreina orkugjafa innan Evrópusambandsins. Þetta voru megin skilaboð Dan Jørgensen, orkumálastjóra ESB, á árlegum fundi Euroheat and Power í Brussel, 3. nóvember s.l. Orkumálastjórinn nefndi í ræðu sinni helstu áskoranir ESB í orkumálum sem eru að hans mati að lækka orkuverð, minnka losun gróðurhúsalofttegunda og efla orkuöryggi. Meiri nýting jarðhita er augljóslega mikilvæg á öllum þessum sviðum. Tveir þriðju af þeirri orku sem notuð er innan ESB til hitunar og kælingar er úr jarðefnaeldsneyti sem kaupa þarf dýrum dómum á alþjóðlegum orkumörkuðum. Dan Jørgensen sagði að ESB væri að undirbúa stefnumótun um hitun og kælingu „Heating and Cooling Strategy.“ „Við ætlun að stækka hratt hlut endurnýjanlegra orkugjafa,“ sagði orkumálastjórinn ennfremur. Framkvæmdastjórn ESB hyggst einnig setja upp samstarfsvettvang um nýtingu jarðhita „Geothermal Stakeholders Partnership“ snemma á næsta ári. Samorka fylgist grannt með framvindu þess máls og leggur áherslu á að sjónarmið og reynsla íslenskra jarðhitafyrirtækja verði tekin með í reikninginn. Samorka er einnig meðlimur í EGEC, evrópsku jarðhitasamtökunum sem eru í stöðugum samskiptum við framkvæmdastjórnina um þennan samstarfsvettvang og fleira.
16. október 2026 Evrópuþingmenn þrýsta á framkvæmdastjórn ESB að efla nýtingu jarðhita Hópur þingmanna á Evrópuþinginu hefur þrýst á framkvæmdastjórn Evrópusambandsins að leggja fram sérstaka aðgerðaáætlun um nýtingu jarðhita. Forseti Framkvæmdastjórnar ESB, Ursula von der Leyen hefur bent á stefnumótun og fyrirhugaðar aðgerðir til að efla jarðhitanýtingu en hinsvegar bólar enn ekki á sjálfstæðri aðgerðaáætlun. Þingmennirnir skrifuðu forseta framkvæmdastjórnarinnar Ursulu von der Leyen í vor og rifjuðu upp að á Evrópuþinginu væri mikill pólitískur stuðningur við aukna nýtingu jarðhita. Áskoranir sem ESB stæði frammi fyrir í alþjóðlegu efnahags- og öryggisumhverfi kölluðu líka á skýrar aðgerðir til að jarðhiti yrði lykil orkugjafi og því væri tímabært að framkvæmdastjórnin birti sérstaka aðgerðaáætlun í samræmi við óskir Evrópuþingsins og orkumálaráðherra ESB. Þingmennirnir sögðu að samkvæmt sínum upplýsingum væri þegar búið að skrifa drög að þessari áætlun en með birtingu hennar væru send skýr skilaboð til fjárfesta, fyrirtækja og neytenda. Ursula von der Leyen svaraði bréfi þingmannanna nú í byrjun október og sagði að stuðningur þingmannanna við aukna nýtingu jarðhita væri í samræmi við markmið framkvæmdastjórnarinnar um orkuöryggi, hagstætt orkuverð og orkuskipti. Forseti framkvæmdastjórnarinnar minnti á AccelerateEU yfirlýsingu ESB sem birt var fyrr á árinu en þar er að finna áherslur til að hraða nýtingu jarðhita og ryðja úr vegi hindrunum á því sviði. Þá gat von der Leyen um rafvæðingaráætlun ESB, (Electrification Action Plan) sem birt var í sumar og dregur fram sóknarfæri í nýtingu jarðhita til orkuöflunar. Hún benti á að í rafvæðingaráætluninni væri einnig greint frá því fyrirhuguðum samráðsvettvangi „European Geothermal Stakeholder Partnership“ (GSP) sem framkvæmdastjórnin hyggst koma á fót ekki síðar en á fyrsta ársfjórðungi 2027. GSP á að vera vettvangur til að safna saman sérfræðingum á þessu svið. Viðfangefni þeirra verði m.a. hvernig best sé að halda utan um rannsóknargögn, móta stefnu í einstökum ríkjum um nýtingu jarðhita, koma á árangursríkum vinnubrögðum í leyfisveitingum og fjármögnun, efla sérfræðikunnáttu og ná víðtækri samfélagslegri sátt um nýtingu jarðhita. Samorka fylgist grannt með þessari þróun og hefur upplýst lykil aðildarfyrirtæki um það sem efst er á baugi hverju sinni. Ísland er í fremstu röð í nýtingu jarðhita og fyrirtæki innan vébanda Samorku hafa komið á framfæri sjónarmiðum sínum, bæði við EGEC, evrópsku jarðhitasamtökin og einnig við framkvæmdastjórn ESB með milligöngu Evrópuskrifstofu Samorku í Brussel. Vonir eru bundnar við „Geothermal Stakeholder Partnership“ en eftir stendur að framkvæmdastjórnin þarf að birta sem fyrst sérstaka aðgerðaáætlun um nýtingu jarðhita sem tekur m.a. mið af þekkingu og reynslu við nýtingu jarðhita hér á landi. Embættismenn hjá framkvæmdastjórninni hafa staðfest við fulltrúa EGEC að áætlunin væri enn á stefnuskránni en betur má ef duga skal.
24. mars 2026 ESB opnar samráðsgátt um ramma fyrir endurnýjanlega orku eftir 2030 Framkvæmdastjórn Evrópusambandsins hefur hleypt af stokkunum samráðsferli til að móta lagaramma ESB fyrir endurnýjanlega orku á næsta áratug þessarar aldar. „Renewable energy framework post-2030.“ Markmiðið er að Evrópa haldi sínu striki í að ná loftslagsmarkmiðum en tryggja einnig samkeppnishæfni álfunnar, orkuöryggi og sjálfbærni. Stefnan er að sú að þessi löggjafartillaga framkvæmdastjórnarinnar verði afgreidd fyrir árslok. Við gerð tillögunnar vill framkvæmdastjórnin nýta sér það sem haghafar og almenningur leggur af mörkum í samráðinu. ESB segir að tilgangurinn með lagarammanum um endurnýjanlega orku á næsta áratug, eftir 2030, sé að tryggja áreiðanlegt framboð af orku sem framleidd er í Evrópu á viðráðanlegu verði fyrir almenning og fyrirtæki. Í kynningu á samráðsgáttinni er lögð áhersla á að endurnýjanlegir orkugjafar verði liður í því að ná markmiðum ESB um að árið 2040 verði búið að minnka losun gróðurhúsalofttegunda innan sambandsins um 90% miðað við losun árið 1990. Þetta þurfi að gera með hagkvæmum og sjálfbærum hætti. Þegar litið er á samsetningu orkugjafa innan ESB (energy mix) hefur hlutur endurnýjanlegra orkulinda tvöfaldast á undanförnum 13 árum og var 25,4% árið 2024. Þetta þýðir þó líka að hraða þarf þróuninni í þessum geira og auka t.d. mjög notkun hreinnar orku í flutningum, hitun og kælingu. Framkvæmdastjórn ESB hvetur haghafa og almenning til að senda innlegg í þessa samráðsgátt. Annars vegar er kallað eftir gögnum og upplýsingum eða „call for evidence“ og er sú gátt opin til 16. apríl n.k. Almenn samráðsgátt eða „Public Consultation“ er opin til 12. júní n.k. Þessi framtíðarstefnumótun ESB um lagaumhverfi, reglur og fleira mun á efa snerta hagsmuni íslenska orku- og geirans með margvíslegum hætti enda eru allar okkar orkulindir endurnýjanlegar. Og frá gildistöku samningsins um Evrópska efnahagssvæðið hafa löggjöf og reglur ESB að verulegu leyti mótað starfsumhverfi orku- og veitufyrirtækja hér á landi. Það er því þess virði að kynna sér málið nánar, sjá hvað framtíðin kann að bera í skauti sér og leitast við að hafa áhrif á hvernig hún lítur út, með því að koma að sjónarmiðum okkar í þessa samráðsgátt. Sjá hér hlekk á samráðsgátt framkvæmdastjórnar ESB með margvíslegum fleiri upplýsingum. https://energy.ec.europa.eu/news/renewable-energy-framework-post-2030-consultations-launched-2026-03-20_en: ESB opnar samráðsgátt um ramma fyrir endurnýjanlega orku eftir 2030
9. mars 2026 Evrópusambandið birtir aðgerðaáætlun um nýtingu jarðhita 19. maí Evrópusambandið mun birta aðgerðaáætlun sína um nýtingu jarðhita þann 19. maí n.k. samkvæmt upplýsingum frá EGEC – evrópsku jarðhitasamtökunum sem Samorka er aðili að. Forseti framkvæmdastjórnar ESB, Ursula von der Leyen, hefur einnig staðfest að áætlunin sé væntanleg að því er Euracitiv fréttamiðillinn greinir frá. Fulltrúi Samorku hvatti framkvæmdastjórnina til að setja fram metnaðarfulla aðgerðaætlun, í pallborði með fulltrúa ESB og fleirum á ráðstefnu hér í Brussel 25. febrúar s.l. Samorka, HS Orka, Landsvirkjun og Veitur voru meðal þeirra sem skrifuðu undir bréf EGEC þann 11. desember s.l. til framkvæmdastjórnar Evrópusambandsins um að stórefla nýtingu jarðhita í Evrópu með aðgerðaáætluninni Hún er hluti af svokallaðri „Heating and Cooling Strategy“ á vegum ESB. Í bréfinu er lögð áhersla á að með skýrri stefnumótun og pólitískum skuldbindingum ráðamanna sé hægt að auka fjárfestingar, efla nýsköpun og einfalda ferli leyfisveitinga til að jarðhiti verði ein af forsendum fyrir orkuskiptum í Evrópu og orkusjálfstæði álfunnar. Þá lýstu þingmenn á Evrópuþinginu eindregnum stuðningi við stóraukna nýtingu jarðhita í umræðum þann 16. október. Þeir sögðu að þessi endurnýjanlega orkulind væri mjög vannýtt í álfunni en ryðja þyrfti hindrunum úr vegi til að efla vinnslu á jarðhita til húshitunar og fleiri nota. Einn þingmaður benti á Ísland sem dæmi um land þar sem hægt væri að hafa fjárhagslegan hagnað af jarðhitanýtingu. Umræðan var á vegum orkunefndar Evrópuþingsins. Tveimur dögum áður var Dan Jörgensen orkumálastjóri ESB meðal frummælenda á ráðstefnu um nýtingu jarðhita „Our Climate Future“ hér í Brussel. Samorka tók þátt í að skipuleggja ráðstefnuna sem var fjölsótt. Þar talaði einnig Jóhann Páll Jóhannsson ráðherra umhverfis, orku og loftslags en Stefán Haukur Jóhannesson sendiherra í Brussel opnaði ráðstefnuna. Samorka og nokkur aðildarfyrirtæki ásamt íslenskum stjórnvöldum sendu einnig umsagnir um aðgerðaáætlunina inn í samráðsgátt ESB snemma í október. Í sinni umsögn lagði Samorka m.a. áherslu á leiðtogahlutverk Íslands – hvernig íslensk orkufyrirtæki hafi margt fram að færa til að efla nýtingu jarðhita í Evrópu. Þessi orka úr iðrum jarðar geti verið í lykilhlutverki í orkuskiptum og til að ná loftslagsmarkmiðum. Það sé einnig mikilvægt að hverskyns löggjöf frá ESB á þessu sviði taki mið af sjálfbærnimarkmiðum og eðli jarðhitanýtingar til orkuframleiðslu. Nýjar reglur megi ekki standa í vegi fyrir eða grafa undan nýtingu þessarar sjálfbæru orkulindar. Það verður athyglisvert að sjá hvort aðgerðaáætlunin stendur undir þeim vonum sem við hana eru bundnar og Samorka mun fylgjast grannt með málinu.
19. desember 2025 Samorka, HS Orka, Landsvirkjun og Veitur styðja ákall EGEC til ESB um öfluga jarðhitaáætlun Samorka, HS Orka, Landsvirkjun og Veitur eru meðal þeirra sem skrifa undir bréf EGEC , European Geothermal Energy Council, til framkvæmdastjórnar Evrópusambandsins um að stórefla nýtingu jarðhita í Evrópu með sérstakri aðgerðaáætlun sem framkvæmdastjórnin er nú með í smíðum. Bréfið var sent 11. desember s.l. og stílað á Dan Jørgensen orkumálastjóra ESB og fleiri háttsetta embættismenn í framkvæmdastjórninni. Undir það skrifar fjöldi fyrirtækja, stofnana og samtaka um alla Evrópu. EGEC minnir á að jarðhiti hafi mikla möguleika á að styrkja orkuöryggi Evrópu, auka samkeppnishæfni álfunnar og lækka orkuverð til almennings. Aðgerðaáætlunin um nýtingu jarðhita á að vera hluti af svokallaðri „Heating and Cooling Strategy“ sem Evrópusambandið hyggst birta á fyrsta ársfjórðungi 2026. Í bréfinu er lögð áhersla á að með skýrri stefnumótun og pólitískum skuldbindingum ráðamanna sé hægt að auka fjárfestingar, efla nýsköpun og einfalda ferli leyfisveitinga til að jarðhiti verði ein af forsendum fyrir orkuskiptum í Evrópu og orkusjálfstæði álfunnar. Samorka er aðili að EGEC og tekur virkan þátt í starfi samtakanna auk þess að miðla upplýsingum af þessum vettvangi til aðildarfyrirtækja sem nýta jarðhita til orkuöflunar og vinnslu. Ráðstefnan Our Climate Future í Brussel í haust beindi einnig sjónum að forystuhlutverki Íslands í jarðhitanýtingu með þátttöku fulltrúa íslenskra fyrirtækja, Jóhanns Páls Jóhannssonar umhverfis- orku- og loftslagsráðherra og Dan Jørgensen orkumálastjóra ESB, auk margra fleiri. Sjá einnig heimasíðu EGEC: https://www.egec.org/news/ : Samorka, HS Orka, Landsvirkjun og Veitur styðja ákall EGEC til ESB um öfluga jarðhitaáætlun
10. nóvember 2025 Vestfirðir eru heitur reitur Podcast: Play in new window | Download (Duration: 45:08 — 42.7MB)Subscribe: Apple Podcasts | Spotify | Android | RSS | More Á Vestfjörðum hefur verið notast við rafkyntar hitaveitur í stað hefðbundinna jarðhitaveitna, því lítið hefur fundist í gegnum tíðina af nægilega heitu vatni sem gæti nýst til húshitunar. En með tækniframförum og myndarlegu átaki stjórnvalda í jarðhitaleit á svæðinu hefur vonin aldeilis kviknað um að þetta geti breyst, íbúm á svæðinu til mikilla hagsbóta. Elena Dís Víðisdóttir, verkfræðingur á orkusviði hjá Orkubúi Vestfjarða, ræðir uppganginn og stemninguna á Vestfjörðum við Lovísu Árnadóttur og hvernig Vestfirðir eru heitur reitur, líka hvað varðar jarðhita.
17. október 2025 Stuðningur á Evrópuþinginu við aukna nýtingu jarðhita Þingmenn á Evrópuþinginu lýstu eindregnum stuðningi við stóraukna nýtingu jarðhita í umræðum í dag 16. október. Þeir sögðu að þessi endurnýjanlega orkulind væri mjög vannýtt í álfunni en ryðja þyrfti hindrunum úr vegi til að efla vinnslu á jarðhita til húshitunar og fleiri nota. Einn þingmaður benti á Ísland sem dæmi um land þar sem hægt væri að hafa fjárhagslegan hagnað af jarðhitanýtingu. Umræðan var á vegum orkunefndar Evrópuþingsins. Þingmenn sem tóku til máls sögðu að hægt væri að finna jarðhita og nýta hann víða í Evrópu ekki síst þegar borað er dýpra þar sem hitinn er meiri. Lághitinn væri auðvitað nýtanlegur og varmadælur bar einnig á góma. Mikilvægt væri að efla rannsóknir og kortlagningu jarðhita, skýra og bæta ferli leyfisveitinga og tryggja að nærsamfélagið væri með í ráðum þegar ráðist væri í boranir og vinnslu. Í umræðunni kom líka fram að hægt væri að auka orkuöryggi og stórminnka notkun á gasi til hitunar og kælingar innan Evrópusambandsins. ESB hefur einmitt sett sér það markmið að hætta alfarið að kaupa gas af Rússlandi fyrir lok ársins 2027. Margir þingmanna bentu á mikilvægi þess að tryggja fjármögnun til jarðhitaverkefna þar sem upphafskostnaður væri gjarnan töluverður, áhætta fyrir hendi og ákveðin óvissa um árangur. Uppskeran gæti þó að sama skapi verið mikil. Ísland hefur áratugum saman verið í fremstu röð á heimsvísu í nýtingu jarðhita til húshitunar og raforkuframleiðslu. Framkvæmdastjórn Evrópusambandsins er einnig að undirbúa aðgerðaáætlun um eflingu jarðvarma sem birt verður snemma á næsta ári. Hún er hluti af víðtækari stefnu um hitun og kælingu. Samorka senti inn umsögn í samráðsgátt ESB vegna þeirra stefnumótunar og benti þar m.a. á forystuhlutverk Íslands í jarðhitanýtingu. Evrópuþingmenn binda greinilega vonir við aðgerðaáætlunina og spurðu fulltrúa framkvæmdastjórnarinnar á nefndarfundinum um helstu áherslur í henni. Þau svör fengust að samráð vegna vinnslu áætlunarinnar væri í fullum gangi og athyglin beindist einmitt að leyfisveitingum og fjármögnun auk þess sem tekið yrði mið af jarðhitaverkefnum í Evrópu sem gengið hafa vel. Landsvirkjun og Orka náttúrunnar sendu einnig inn umsagnir í samráðsgáttina ásamt íslenskum stjórnvöldum. Vonir eru bundnar við að þær upplýsingar, dæmi um verkefni og almenn sjónarmið gagnist sérfræðingum framkvæmdastjórnarinnar sem voru líka þátttakendur í pallborðsumræðum á Our Climate Future-ráðstefnunni í Brussel um nýtingu jarðhita, þriðjudaginn 14. október s.l. Með fulltrúum framkvæmdastjórnarinnar í pallborði voru stjórnendur íslenskra orkufyrirtækja sem eru í forystu í nýtingu jarðhita – Landsvirkjunar, Orku náttúrunnar og HS Orku auk stjórnarformanns Samorku, Sólrúnar Kristjánsdóttur. Orkumálastjóri ESB, Dan Jörgensen sagði í opnunarræðu ráðstefnunnar að Ísland vísaði veginn í nýtingu jarðhita og möguleikarnir væru miklir á þessu sviði. Jóhann Páll Jóhannsson, umhverfis- orku og loftslagsráðherra, sagði að Ísland væri tilbúið til samstarfs með því að deila reynslu og þekkingu á nýtingu jarðhita. Stefán Haukur Jóhannesson, sendiherra bauð gesti velkomna og deildi m.a. með fundargestum frásögn af hraunhitaveitunni í heimabæ sínum Vestmannaeyjum. Sjá hér að neðan upptöku af umræðum Evrópuþingmanna um jarðhita, 16. október. Umræðan stendur í um 50 mínútur og byrjar ca. 35 mínútur inn í upptökuna: Committee on Industry, Research and Energy Ordinary meeting – Multimedia Centre: Stuðningur á Evrópuþinginu við aukna nýtingu jarðhita Hér er einnig hægt að skoða umsagnir sem Samorka, Landsvirkjun, Orka náttúrunnar og íslensk stjórnvöld sendu inn í samráðsgátt ESB vegna stefnu um hitun og kælingu – þ.á.m. jarðhita: https://ec.europa.eu/info/law/better-regulation/have-your-say/initiatives/14818-Energy-Heating-and-Cooling-Strategy/feedback_en?p_id=20290: Stuðningur á Evrópuþinginu við aukna nýtingu jarðhita
10. október 2025 Öflugt jarðhitaþing í Zürich Fulltrúi Samorku tók þátt í Evrópska Jarðhitaþinginu, European Geothermal Congress, sem haldið var Zürich í Sviss frá 6.- 10. október. Þátttakendur voru hátt í 1200 talsins frá yfir 40 löndum. Á þingið mætti öflugur hópur frá Íslandi, yfir 20 fulltrúar orku-, tækni- og ráðgjafarfyrirtækja, háskóla og fleiri til að segja frá því sem við höfum fram að færa og til að læra af öðrum þátttakendum. Þrír af fjölmörgum fulltrúum frá Íslandi á ráðstefnunni. „Ísland hefur áratugum saman verið í fremstu röð á heimsvísu í nýtingu jarðhita til húshitunar og raforkuframleiðslu og lét svo sannarlega til sín taka hér,“ sagði Sveinn Helgason, verkefnastjóri erlends samstarfs hjá Samorku, sem sat ráðstefnuna. „Það er mikilvægt til að efla enn frekar nýtingu þessarar endurnýjanlegu orkulindar á alþjóðavísu og metnaðurinn er fyrir hendi víða um heim. Þannig er Evrópusambandið t.d. að undirbúa sérstaka aðgerðaáætlun um eflingu jarðvarma sem birt verður snemma á næsta ári. Samorka senti inn umsögn í samráðsgátt ESB vegna þeirra stefnumótunar og benti þar m.a. á forystuhlutverk Íslands á þessu sviði.“ European Geothermal Energy Council – Evrópsku jarðhitasamtökin – héldu ráðstefnuna og á aðalfundi samtakanna var tilkynnt um nýja stjórn þar sem Miklos Antics er forseti. Það var athyglisvert að svissnesku gestgjafarnir ætla sér stóra hluti í jarðhita og í vettvangsferð síðasta dag þingsins kom glögglega í ljós hversu rannsóknir og vísindi gegna þar mikilvægu hlutverki. Næsta Evrópska jarðhitaþingið verður haldið í Búdapest í Ungverjalandi árið 2028. Ný stjórn EGEC – Evrópsku jarðhitasamtakanna. Sveinn tók nokkra íslenska þátttakendur tali á ráðstefnunni og má hlusta á það í spilaranum hér fyrir neðan. Podcast: Play in new window | Download (Duration: 19:07 — 14.3MB)Subscribe: Apple Podcasts | Spotify | Android | RSS | More