31. október 2016 Samorka óskar eftir að ráða framkvæmdastjóra Samorka óskar eftir að ráða framkvæmdastjóra. Leitað er að reyndum leiðtoga sem býr yfir góðri samskiptafærni, frumkvæði og skipulögðum vinnubrögðum. Einstaklingi sem hefur það sem þarf til að starfrækja jákvæðan vettvang um starfsemi orku- og veitufyrirtækja. Intellecta hefur umsjón með ráðningunni og má sjá auglýsinguna um starfið á heimasíðu þeirra. Auglýsingin birtist fyrst í Fréttablaðinu laugardaginn 29. október. Helstu verkefni: Stjórnun og ábyrgð á daglegum rekstri Ábyrgð á starfsemi Samorku gagnvart stjórn Innleiða og framfylgja stefnu og ákvörðunum stjórnar/aðalfundar Stuðla að og bera ábyrgð á góðum tengslum við aðildarfyrirtæki og rækta félags- og fræðslustarf Samskipti og upplýsingar Menntunar- og hæfniskröfur: Háskólamenntun sem nýtist í starfi Stjórnunarreynsla Þekking á starfsumhverfi orku- og veitufyrirtækja er kostur Þekking á umhverfismálum og nýtingu náttúruauðlinda er æskileg Góðir samskiptahæfileikar og færni í að tjá sig í ræðu og riti Góð tungumálakunnátta í íslensku og ensku, kostur að hafa einnig kunnáttu í Norðurlandamáli Aðrar upplýsingar: Bæði konur og karlar eru hvött til að sækja um starfið. Nánari upplýsingar um starfið veita Ari Eyberg (ari@intellecta.is) og Þórður S. Óskarsson (thordur@intellecta.is) í síma 511 1225. Umsóknarfrestur er til og með 14. nóvember 2016. Umsókn óskast fyllt út á www.intellecta.is og henni þarf að fylgja ítarleg starfsferilskrá og kynningarbréf. Farið verður með allar fyrirspurnir og umsóknir sem trúnaðarmál.
26. október 2016 Gústaf lætur af störfum sem framkvæmdastjóri Gústaf Adolf Skúlason hefur sagt starfi sínu sem framkvæmdastjóri Samorku lausu. Gústaf hefur gegnt starfinu frá mars 2013 og þar áður starfi aðstoðarframkvæmdastjóra samtakanna frá ársbyrjun 2007. Hann mun gegna starfi framkvæmdastjóra þar til nýr tekur til starfa, og verða samtökunum innan handar fyrst um sinn í kjölfar þess. Stjórn og starfsfólk Samorku þakka Gústafi fyrir vel unnin störf í þágu íslenskra orku- og veitumála og óska honum velfarnaðar í framtíðinni. Starf framkvæmdastjóra Samorku verður auglýst á laugardag og er ráðningin í höndum Intellecta. Gústaf Adolf Skúlason, fráfarandi framkvæmdastjóri Samorku, á skrifstofu sinni. Gústaf segir tíma sinn hjá Samorku hafa verið afar ánægjulegan og lærdómsríkan. „Þessi áratugur í starfi á vettvangi Samorku hefur verið afar ánægjulegur og lærdómsríkur. Ég hef fylgst með og tekið þátt í miklum breytingum á starfsumhverfi og uppbyggingu þessara greina og átt ánægjulegt samstarf við mikinn fjölda af góðu fólki.“ Gústaf segir að orka og veituþjónusta séu forsendur alls atvinnulífs, heimilisreksturs og flestra okkar daglegu athafna í nútíma samfélagi. „Við getum verið þakklát fyrir okkar grænu orkulindir og heilnæma drykkjarvatn, en jafnframt verið stolt af þeim öflugu orku- og veitufyrirtækjum sem sjá um nýtingu þessara ríkulegu auðlinda og dreifingu gæðanna til landsmanna allra“, segir Gústaf. Helgi Jóhannesson, formaður Samorku, segir hafa verið afar ánægjulegt að vinna með Gústafi á vettvangi Samorku undanfarin ár. „Gústaf hefur staðið sig mjög vel sem framkvæmdastjóri samtakanna og kann stjórn Samorku honum bestu þakkir fyrir óeigingjarnt og farsælt starf liðin ár.“
20. október 2016 Orku- og veituþjónusta langódýrust á Íslandi Íslensk heimili greiða langminnst fyrir orku- og veituþjónustu á Norðurlöndum. Samanlagt greiða Íslendingar rúmum 400 þúsund krónum minna fyrir kalt og heitt vatn, rafmagn og fráveitu á hverju ári en þar sem þjónustan er dýrust. Sé miðað við heildarreikning fyrir 100 fermetra íbúð og meðalnotkun á ári, greiðir íslenskt heimili aðeins um 247 þúsund krónur fyrir orku- og veituþjónustu. Í Kaupmannahöfn greiða íbúar í sams konar íbúð 655 þúsund krónur, sem er hæsta verðið á Norðurlöndunum og tæpum 34 þúsundum meira á mánuði en á Íslandi. Næstmest borga Finnar, eða um 588 þúsund á ári hverju og Svíar borga 480 þúsund. Orku- og veituþjónusta kostar næstminnst í Noregi, en þar greiðast 431 þúsund krónur árlega, sem er þó tæpum 184 þúsund krónum meira en á Íslandi. Á heildarreikningi heimilanna munar mestu um verð á heitu vatni – Íslendingar greiða langtum minna fyrir það en aðrir íbúar Norðurlanda. Forsendur: Rafmagn: 4.800 kWst ársnotkun. Heitt vatn: 100m2 íbúð, 495 tonna ársnotkun. Kalt vatn: 100m2 íbúð, 240 tonna ársnotkun. ATH! Á Íslandi er notkun ekki mæld, heldur miðuð við stærð húsnæðis. Íslendingar nota meira magn af köldu vatni á mann en aðrir íbúar Norðurlanda. Fráveita: 100m2 íbúð, 240 tonna ársnotkun.
13. október 2016 Menntun og mannauður: Starfsþjálfun í fyrirtækjum Fundaröðin Menntun og mannauður heldur áfram í Húsi atvinnulífsins fimmtudaginn 20. október frá kl. 8.30-10. Að þessu sinni verður kynning á TTRAIN (Tourism training) verkefninu, en það snýst um að mennta einstaklinga innan ferðaþjónustufyrirtækjanna og endurmennta þá sem fyrir eru. Sambærilegt verkefni hefur verið útfært fyrir verslunina á Íslandi þannig að það getur haft breiða skírskotun, þ.e.a.s. hentar ekki endilega einungis aðilum í ferðaþjónustu. Nánari upplýsingar og dagskrá má sjá á vef Samtaka atvinnulífsins. Samtök atvinnulífsins, Samtök ferðaþjónustunnar, Samtök fyrirtækja í sjávarútvegi, Samtök fjármálafyrirtækja, Samtök iðnaðarins, Samorka og Samtök verslunar og þjónustu standa að fundaröðinni Menntun og mannauður sem mun standa til vors 2017.
13. október 2016 Landsvirkjun bakhjarl Kvenna í orkumálum Frá undirritun samningsins: f.v. Helga Barðadóttir, sérfræðingur hjá Umhverfis- og auðlindaráðuneytinu og stjórnarmaður Kvenna í orkumálum, Harpa Pétursdóttir, lögfræðingur hjá BBA og formaður Kvenna í orkumálum, Hörður Arnarson, forstjóri Landsvirkjunar og Ragna Árnadóttir, aðstoðarforstjóri Landsvirkjunar. Landsvirkjun verður bakhjarl félagsins Kvenna í orkumálum til tveggja ára. Skrifað var undir styrktarsamning þess efnis í vikunni. Félagið Konur í orkumálum var stofnað fyrr á árinu og telja félagsmenn nú um 200 talsins. Félagið er opið öllum þeim sem starfa við orkumál eða hafa áhuga á orkumálum á Íslandi. Tilgangur félagsins er að efla þátt kvenna í orkumálum og styrkja tengsl þeirra á milli, svo og að stuðla að menntun og fræðslu kvenna er varðar orkumál. Harpa Pétursdóttir, lögfræðingur hjá BBA og formaður Kvenna í orkumálum, þakkaði stuðninginn við við undirritun samningsins og sagði það mikið ánægjuefni að stjórnendur orkufyrirtækja á Íslandi sæju að ástæða sé til að auka hlut kvenna í geiranum, sem er einn megintilgangur félagsins. Hörður Arnarson, forstjóri Landsvirkjunar, sagði við sama tilefni að það væri fyrirtækinu sérstaklega ánægjulegt að styrkja þennan félagsskap, hann hefði alla burði til að hafa jákvæð áhrif innan orkugeirans á komandi misserum og árum. Fyrir er Landsbankinn einnig bakhjarl Kvenna í orkumálum, en tilkynnt var um þann samning í september.
6. október 2016 Orkusalan gefur hleðslustöðvar fyrir rafbíla Orkusalan, dótturfyrirtæki RARIK, gefur öllum sveitarfélögum landsins hleðslustöð fyrir rafbíla, alls um 80 talsins. Með þessu vill fyrirtækið auðvelda rafbílaeigendum að komast leiðar sinnar hringinn í kringum landið. Fyrsta stöðin verður sett upp í Vestmannaeyjum á næstu vikum. Ísland er í lykilstöðu til að leiða rafbílavæðingu heimsins og vill Orkusalan leggja sitt af mörkum með samfélagslega ábyrgð að leiðarljósi. Hleðslustöðvar Orkusölunnar koma til viðbótar hraðhleðslustöðva Orku náttúrunnar, sem eru alls 13 talsins.
6. október 2016 Ánægja með vatnsveituráðstefnu Norrænu vatnsveituráðstefnunni lauk á dögunum, en hún er haldin annað hvert ár á Norðurlöndunum. Í ár fór ráðstefnan fram á Íslandi og þótti takast með eindæmum vel. Hún var haldin í Hörpu, nánar tiltekið í Silfurbergi og Björtuloftum. Veðrið skartaði sínu fegursta og útsýnið úr Hörpu var frábært, svo það gerði góða ráðstefnu enn ánægjulegri. Um 300 þátttakendur mættu til leiks og erindin voru alls um 100 talsins og til gamans má geta að meirihluti þeirra sem þau fluttu voru konur. Philip McCleaf frá Uppsala Vatten och Avlopp AB varð hlutskarpastur í kosningu um besta erindið og fékk peningaverðlaun fyrir. Næst verður ráðstefnan haldin í Noregi árið 2018. Ráðstefnugestir voru á öllum aldri
6. október 2016 Nýjar víddir jarðvarmans á haustfundi JHFÍ Haustfundur JHFÍ verður haldinn fimmtudaginn 13. október næstkomandi, frá 15:00-16:30. Fundurinn verður haldinn hjá Orkuveitu Reykjavíkur, að Bæjarhálsi 1, 110 Reykjavík. Þema fundarins er „Nýjar víddir jarðvarmans“ og kaffi og meðlæti er í boði OR. Dagskrá: 15:00 – 15:05 Setning fundarins Kristín Vala Matthíasdóttir, formaður Jarðhitafélags Íslands 15:05 – 15:10 Úthlutun á styrk JHFÍ 15:10 – 15:15 Ávarp fundarstjóra Fulltrúi frá Konum í Orkumálum 15:15 – 15:30 Vistferilsgreining á rafmagni og heitu vatni frá Hellisheiðarvirkjun Marta Rós Karlsdóttir, forstöðumaður auðlinda, Orku Náttúrunnar 15:30 – 15:45 CarbFix verkefnið: Kolefnisbinding á jarðhitasvæðum Sandra Ósk Snæbjörnsdóttir, doktorsnemi í jarðefnafræði, Háskóla Íslands 15:45 – 15:55 Uppfærsla á þrívíðu hugmyndalíkani af jarðhitasvæðinu í Kröflu Unnur Þorsteinsdóttir, jarðfræðingur, ÍSOR 15:55 – 16:05 Efnisval og prófanir á húðunarefnum fyrir Jarðhitahverfla Helen Ósk Haraldsdóttir, meistaranemi, Háskóla Íslands 16:05 – 16:20 Role of multidisciplinary geothermal exploration for drilling, monitoring and modelling Maryam Khodayar, jarðfræðingur, ÍSOR 16:20 – 16:30 Lokaorð fundarstjóra og fundarslit
28. september 2016 Norræna vatnsveituráðstefnan í Hörpu Helgi Jóhannesson, stjórnarformaður Samorku, setur Norrænu vatnsveituráðstefnuna í Hörpu Fátt er mikilvægara en aðgengi að heilnæmu og góðu vatni. Til þess þarf góðar vatnsveitur, reglubundnar rannsóknir og framþróun. Norræna vatnsveituráðstefnan, sú tíunda í röðinni, hófst í Hörpu í Reykjavík í dag, miðvikudaginn 28. september. Þar koma saman helstu vísindamenn og sérfræðingar Norðurlandanna í drykkjarvatni. Um 300 manns taka þátt í ráðstefnunni og flutt verða hátt í 100 erindi um helstu viðfangsefni vatnsveitna á Norðurlöndum. Helgi Jóhannesson, stjórnarformaður Samorku og framkvæmdastjóri Norðurorku, setti ráðstefnuna og bauð gesti velkomna. Þá ávarpaði Gunnar Bragi Sveinsson, sjávarútvegs- og landbúnaðarráðherra, fundargesti. Hann ræddi mikilvægi drykkjarvatns og hversu mikilvægt hreint vatn er ímynd Íslands. Aðalfyrirlesarar dagsins eru María Jóna Gunnarsdóttir frá Háskóla Íslands og Mia Bondelind hjá Chalmers Tekniske Högskola í Gautaborg í Svíþjóð. María Jóna fjallaði um það sem huga þarf að hjá litlum vatnsveitum á Norðurlöndum (þ.m.t. á Íslandi), sem lúta oft öðrum eftirlitsreglum en þær stærri vegna þess að þær eru oft til einkanota eða þjónusta lítið landsvæði. Hins vegar sjá þær nú í auknum mæli töluvert stærri fjölda fólks fyrir vatni vegna fleiri ferðamanna. Fylgjast þurfi betur með þessu, því flest frávik sem mælast í drykkjarvatni á Norðurlöndum koma frá litlum vatnsveitum. Litlar vatnsveitur þjónusta um þrjár milljónir íbúa á Norðurlöndum. María Jóna Gunnarsdóttir flytur erindi sitt um litlar vatnsveitur á Norðurlöndum. María Jóna telur nauðsynlegt að skylda litlar vatnsveitur til að gangast undir reglubundið eftirlit og taka upp innra eftirlit, til að ganga úr skugga um að vatnið sem þær veita sé heilnæmt. Mia Bondelind fjallaði um traust fólks á vatnsveitum, áhættumat almennings þegar kemur að drykkjarvatni og almennt um viðhorf til drykkjarvatns, þar sem Norðurlandabúar taki hreinu drykkjarvatni almennt sem sjálfsögðum hlut. Mia Bondelind flytur erindi sitt um viðhorf til drykkjarvatns Bondelind sagði mikilvægt að almenningur hafi góðan aðgang að upplýsingum og að vatnsveitur leggi sig fram við að veita þær, bæði þegar allt gengur eðlilega fyrir sig og ef eitthvað fer úrskeiðis. Norræna vatnsveituráðstefnan er haldin annað hvert ár og nú í tíunda sinn. Ráðstefnunni lýkur á föstudag. Nánari upplýsingar um dagskrá og almennar upplýsingar um ráðstefnuna má finna á heimasíðu hennar.
23. september 2016 Ísland önnur umhverfisvænsta þjóð heims Ísland er önnur umhverfisvænsta þjóð heimsins samkvæmt nýrri umhverfisvísitölu Yale háskólans í Bandaríkjunum. Þessi skemmtilega staðreynd þarf ekki endilega að koma á óvart því staða Íslands er mjög sterk í alþjóðasamhengi vegna gnægðar vistvænnar orku hér á landi. Hlutfall endurnýjanlegrar orku við rafmagnsframleiðslu og húshitun er ríflega 99% á Íslandi og vegur þyngst í að skila Íslandi svo ofarlega á lista. Einnig er hlutfall útblásturs gróðurhúsalofttegunda vegna bruna jarðefnaeldsneytis við raforku- og varmaframleiðslu 0%. Í öðrum löndum Evrópu nær þessi tala allt að 80%. Finnland kemur best út samkvæmt vísitölunni og Danmörk og Svíþjóð koma fast á hæla Íslandi. Þorsteinn Þorsteinsson hjá Markaðsrýni vakti nýlega athygli á þessa nýju vísitölu Yale, Yale‘s Environmental Performance Index (EPI). Þótt að vísitalan sýni hversu framarlega Ísland er þegar kemur að loftslagsmálum, þá má ná enn betri árangri. Eins og staðan er í dag er hlutfall endurnýjanlegrar orku í samgöngum lágt í samanburði við önnur lönd, eða 3,3%, en rafbílum fer þó hratt fjölgandi. Þarna liggja langstærstu tækifæri Íslands í loftlagsmálum; Að skipta um orkugjafa í bíla- og skipaflota landsins og minnka þannig útblástur gróðurhúsalofttegunda allverulega. Hægt er að skoða skýrslu Yale í heild sinni á vefnum og lesa sér betur til um forsendur og niðurstöður EPI.