10. október 2008 ESB: Kjarnorkan inn úr kuldanum Forgangsröðunin breytist hratt á tímum alþjóðlegrar fjármálakreppu, segir formaður umhverfisnefndar Evrópuþingsins. Hann segir erfiðara en áður að leggja áherslu á kostnaðarsamar aðgerðir á sviði loftslagsmála, svo dæmi sé tekið. Forseti framkvæmdastjórnar ESB tekur undir, en varar þó við þessari umræðu, þar sem loftslagsmálin geti orðið margfalt kostnaðarsamara viðfangsefni en núverandi fjármálakreppa. Enginn vilji sé þó fyrir því að setja einhliða svo stífar reglur að ESB flytji út losun gróðurhúsalofttegunda en flytji inn atvinnuleysi. Hann segir ljóst að kjarnorkan geti gegnt mikilvægu hlutverki í viðleitni ESB til að draga úr losun gróðurhúsalofttegunda, en talsmenn kjarnorkuiðnaðarins hafa lengi kvartað undan því að þeirra hlutur njóti ekki sannmælis í umræðum um orku- og loftslagsmál á vettvangi ESB. Fjallað var um leiðir til að draga úr losun gróðurhúsalofttegunda í evrópskum orkuiðnaði, á ráðstefnu Businesseurope, Eurelectric og Foratom í Brussel á dögunum. Framkvæmdastjórn ESB hefur sett sér metnaðarfull markmið á sviðum orku- og loftslagsmála, m.a. um samdrátt í losun gróðurhúsalofttegunda (um 20% fyrir árið 2020) og um aukinn hlut endurnýjanlegra orkugjafa í orkunotkun ESB. Er markið sett á 20% hlut þeirra árið 2020 [þetta hlutfall er 80% á Íslandi í dag, enda Ísland óvenju auðugt af endurnýjanlegum orkulindum]. Tillögurnar eru nú til meðferðar í Evrópuþinginu og tvísýnt um framvindu þeirra, en um 1.200 breytingartillögur hafa þar verið lagðar fram við frumvarpið. Óhætt er að segja að alþjóðlega fjármálakreppan hafi sett svip sinn á umræður á fyrrnefndri ráðstefnu. Sama má segja um kjarnorkuna. Talsmenn kjarnorkuiðnaðarins innan ESB hafa lengi kvartað yfir því að kjarnorkan njóti ekki sannmælis í umfjöllun og stefnumótun sambandsins í orku- og loftslagsmálum. Um 30% af þeirri raforku sem notuð er innan ESB er framleidd í kjarnorkuverum. Fram kom á ráðstefnunni að ein leið til að ná markmiðinu um 20% minnkun á losun gróðurhúsalofttegunda væri einfaldlega sú að auka raforkuframleiðslu í kjarnorkuverum um 50%. Umræðan snerist hins vegar nær alfarið um mun dýrari lausnir á sviðum endurnýjanlegra orkugjafa, en innan ESB er ekki síst horft til tækifæra á sviði vindorku (á umræddri ráðstefnu bar vatnsafl t.d. á góma í 2-3 af um 25 erindum, jarðvarma í tveimur). Flytja út losun og flytja inn atvinnuleysi?Miroslav Ouzký, formaður umhverfisnefndar Evrópuþingsins, sagði í erindi sínu að forgangsröðunin breyttist hratt á tímum alþjóðlegrar fjármálakreppu. Stjórnmálamenn legðu nú áherslu á að vernda störf, ekki á umhverfis- og loftslagsmál, a.m.k. ekki þeir sem vildu ná endurkjöri. Gert-Jan Koopman, forstöðumaður á efnahagsmálaskrifstofu framkvæmdastjórnar ESB, benti á að tvennt hefði breyst frá því að metnaðarfullar tillögur framkvæmdastjórnarinnar voru kynntar. Gríðarleg hækkun hefði orðið á orkuverði og mikil áföll átt sér stað á sviði efnahagsmála. Útfærslan væri vissulega öll til skoðunar og ekki vænlegt að ESB setti svo strangar reglur að iðnfyrirtæki veldu sér einfaldlega önnur lönd fyrir sína starfsemi. Ekki væri því áhugi fyrir að flytja út losun gróðurhúsalofttegunda en flytja inn atvinnuleysi í staðinn. José Manuel Barroso, forseti framkvæmdastjórnar ESB, tók undir þau orð í lokaávarpi ráðstefnunnar. Hins vegar værum við í dag mikið að tala um fjármálakreppu til skamms tíma, en loftslagsvandinn væri til langs tíma. Ef því væri frestað um of að takast á við hann yrði hann á endanum margfalt kostnaðarsamari en nokkur fjármálakreppa. Barroso sagði ljóst að kjarnorka væri orkugjafi sem ekki fæli í sér losun gróðurhúsalofttegunda og sem væri samkeppnishæfur í verði. Því yrði að halda þeim valkosti opnum, þ.e. kjarnorkunni, fyrir þau aðildarríki sem vildu fara þá leið.
2. október 2008 Nordic Climate Solutions ráðstefna og sölusýning í Kaupmannahöfn 25-26. nóvember Dagana 25. og 26. nóvember stendur norræna ráðherranefndin fyrir ráðstefnu og sölusýningu þar sem fjallað verður um markaðslausnir vegna hlýnunar loftslags. Kynntar verða lausnir í orkumálum, fjallað um áhrif á stjórnun, fjallað um ólíka markaði o.s.frv., en þátttakendur koma víðs vegar að úr heiminum. Samorka er í hópi fjölda samstarfsaðila ráðstefnunnar og geta félagsmenn Samorku nálgast boðsmiða á skrifstofu samtakanna (tala við Þórhildi, ath., mjög takmarkað upplag) og þannig fengið fellt niður ráðstefnugjaldið sem nemur 450 evrum. Sjá nánar um Nordic Climate Solutions hér á vef ráðstefnunnar.
1. október 2008 Af þekkingargreinum í atvinnulífi Grein Gústafs Adolfs Skúlasonar í Viðskiptablaðinu: Því er iðulega fleygt í opinberri umræðu um atvinnumál að leggja beri áherslu á „þekkingargreinar“. Einhverra hluta vegna eru alltaf sömu fyrirtækin nefnd til sögunnar hér á landi sem þekkingarfyrirtæki, glæsileg iðnfyrirtæki með öflugt rannsóknar- og þróunarstarf. Þó sér hver maður að margs konar rekstur krefst mikillar þekkingar. Til dæmis ef sjá á erlendum viðskiptavinum fyrir ákveðnu magni af tiltekinni fisktegund af tilteknum gæðum í hverri viku árið um kring. Sama gildir um þróun og framleiðslu á nýrri sælgætistegund sem síðan rokselst, rekstur á flugfélagi, banka o.s.frv. Allar greinar eru „þekkingargreinar“Allar atvinnugreinar eru þekkingargreinar í einhverjum skilningi. Vissulega er meiri fjármunum varið í rannsóknir og þróun í sumum greinum eða að minnsta kosti í sumum fyrirtækjum en í öðrum. Og vissulega er menntunarstig hærra í sumum fyrirtækjum en víða annar staðar, þegar horft er til formlegrar menntunar. En alls staðar er samt byggt á uppsafnaðri þekkingu og ástæðulaust að nota þetta hugtak yfir fáar útvaldar greinar í almennri umræðu um atvinnumál. Hver greinin öðrum háðAnnað vandamál við að draga fyrirtæki og jafnvel atvinnugreinar í dilka er að þær eru hver annarri háðar. Þannig þarf togaraútgerð t.d. væntanlega að eiga viðskipti við matvöruverslun, rafverktaka, viðskiptabanka, kerfisstjóra, veitingaþjónustu, símafyrirtæki, bifreiðarstjóra, flugfélög, ritfangaverslun o.s.frv. Vandséð er að velja megi eina grein úr þessari mynd og úrskurða að hún sé öðrum greinum mikilvægari. Innan orkugeirans var um tíma mikil þreyta með umfjöllun sem gerði lítið úr þeirri þekkingu sem þar er að finna, þar sem orkufyrirtækjum var iðulega stillt upp andspænis svonefndum þekkingarfyrirtækjum. Þessi umræða hefur breyst nokkuð eftir að betur kom fram hvernig íslensk orkufyrirtæki hafa upp á að bjóða þekkingu á nýtingu endurnýjanlegra orkugjafa sem eftirspurn er eftir um víða veröld. Til að bregðast við þessari umræðu tók Samorka þó saman að árið 2006 voru til dæmis fimm hundruð ársverk verk- og tæknifræðinga innt af hendi innan greinarinnar hér á landi, hátt á þriðja hundrað af fólki með aðra háskólamenntun og tæp fimm hundruð ársverk fólks með iðnmenntun. Jafnframt var hins vegar athygli vakin á því að svonefndir „ófaglærðir“ innan greinarinnar eru iðulega með mikla þjálfun að baki og óvenju háan starfsaldur. Þar er að sjálfsögðu til staðar verðmæt þekking og reynsla. Og auðvitað eru öll önnur fyrirtæki háð þjónustu orkufyrirtækja, eins og þau eru sjálf háð þjónustu svo margra annarra fyrirtækja úr öðrum greinum. Ekkert fyrirtæki getur sem sagt þrifist án annarra fyrirtækja úr öðrum atvinnugreinum. En má ekki samt velja einhverjar greinar og setja markið á að efla þær? Maður hittir varla svo nýútskrifaða viðskiptafræðinga úr tilteknum háskóla hér á landi að þeir haldi ekki yfir manni ræðu um að Íslendingar verði að feta í fótspor Finna og Íra, veðja á nýsköpun, menntun og „þekkingargreinar“. Nú er kannski skiljanlegt að háskólaprófessorar vilji draga fram mikilvægi formlegrar menntunar og ekki skal hér lítið gert úr því. Eigum „við“ að velja greinar?En er það hlutverk stjórnvalda að velja og hafna við hvaða löglegu iðju fólk starfar? Í hverju fyrirtækin fjárfesta? Ef viðurkennt erlent fyrirtæki bankar hér upp á með marga tugi milljarða króna sem það vill fjárfesta fyrir í íslensku atvinnulífi, er einhver sérstök ástæða til annars en að taka vel á móti þessu fyrirtæki, kynna því okkar lög og reglur (til dæmis um umhverfismál) og óska því velgengni í að fóta sig hér? Iðulega heyrist sagt að „við“ eigum að setja áhersluna á annars konar störf, aðrar greinar. En mega þau fyrirtæki ekki bara koma líka? Hver erum þessi „við“ sem oft er rætt um í slíku samhengi? Auðvitað á að halda hér úti öflugu menntakerfi og auðvitað á að skapa fyrirtækjum samkeppnishæft rekstar- og nýsköpunarumhverfi. En til lengri tíma getur enginn opinber aðili spáð fyrir um hvar tækifærin verði helst í framtíðinni. Það eina sem við vitum er að öll munu fyrirtækin þurfa á viðskiptum við önnur fyrirtæki úr ólíkum greinum að halda, vegna þeirrar þjónustu sem þau hafa þekkingu til að veita.
26. september 2008 Hvernig á að lesa efnagreiningar á neysluvatni Leiðbeiningar um hvernig eigi að lesa út úr efnagreiningum er komnar á vefsíðu Samorku og er hluti af Vatnsveituhandbók. Í neysluvatnsreglugerð nr. 536/2001 er krafa um efnagreiningu á nær fimmtíu eftirlitsþáttum. Nokkuð flókið er fyrir leikmann að lesa út úr því en leiðbeiningunum er ætlað að aðstoða vatnsveitufólk við það. Gefin er stutt lýsing á hverjum eftirlitsþætti, uppruna hans í neysluvatni og áhrif á heilsufar og bragðgæði. Smella hér
25. september 2008 Heita silfrið Hitaveita á Íslandi í 100 ár Samorka hefur gefið út blað í tilefni af 100 ára afmæli hitaveitu á Íslandi. Heita silfrið heitir blaðið og er því dreift með Morgunblaðinu í dag, 25. september. Í blaðinu er fjallað um sögu hitaveitu á Íslandi, rætt við fjölda fólks um þau auknu lífsgæði sem hitaveitunni fylgja, fjallað um sögu jarðhitanýtingar á Íslandi, þróun þekkingar á þessu sviði, ungbarnasund, ferðaþjónustu, jarðhitaleit og margt fleira. Umsjón, textagerð og umbrot voru í höndum Athygli ehf. Ávarp Franz Árnasonar, formanns Samorku og forstjóra Norðurorku, fer hér á eftir. Blaðið má nálgast hér á pdf-formi (7,6 mb). Ávarp Franz Árnasonar, formanns Samorku: Bætt heilsufar og almenn lífsgæði Flest getum við Íslendingar nú á dögum flokkað það sem sjálfsögð lífsgæði að geta hitað hýbýli okkar með ódýru heitu vatni, sótt heitar sundlaugar allt árið um kring, brætt snjó í gangstéttum og götum og andað um leið að okkur hreinu og heilnæmu lofti. Að baki þessum þægindum liggur hins vegar eitt hundrað ára saga hugvits, frumkvæðis og framkvæmdaþreks, varðandi nýtingu jarðhita sem við njótum ávaxtanna af í öllu okkar daglega lífi. Saga jarðhitanýtingar á Íslandi er trúlega um það bil jafn löng og saga byggðar í landinu. Í sögulegum heimildum má finna fjölda dæma um nýtingu jarðhita til þvotta, baða, eldamennsku, iðnaðar og heilsueflingar. Mynjar benda til að Snorri Sturluson hafi á sínum tíma leitt heitt vatn í hús, líklega þó aðallega til þvotta. Elsta þekkta dæmið um nýtingu jarðhita til húshitunar á Íslandi er hins vegar að finna í Mosfellsbæ, nánar til tekið á bænum Syðri-Reykjum. Árið 1908 virkjaði Stefán B. Jónsson á Syðri-Reykjum hver til húshitunar og lagði „nútíma“ hitakerfi í íbúðarhús sitt. Í tilefni þessa ákvað Samorka að halda upp á 100 ára afmæli hitaveitu á Íslandi nú í ár. Hlýrri hýbýli, hreinna loft, útivist…Samorka vill á þessum tímamótum einkum beina sjónum fólks að því mikilvæga hlutverki sem heita vatnið hefur gegnt í því skyni að bæta heilsufar og almenn lífsgæði Íslendinga. Er þar meðal annars horft til betri hitunar hýbýla, heilnæmara andrúmslofts og aukinna tækifæra til útivistar og hreyfingar tengdum sundlaugamenningu. Fyrir fáum áratugum gegndi olía stóru hlutverki í húshitun á Íslandi, og kol ef horft er lengra aftur á síðustu öld. Fyrir utan minni mengun getum við jafnframt glaðst yfir því að undanfarna áratugi hefur hitaveitan sparað Íslendingum tugi milljarða króna á ári hverju, sem ella hefðu farið í innflutning á olíu. Í dag væri líkast til notast við raforku í auknum mæli í stað olíu ef ekki nyti við hitaveitunnar. Til þess þyrfti að virkja ár og háhitasvæði sem er mun dýrara en virkjun lághita fyrir hitaveitu. Þetta mundi jafnframt draga úr öðrum möguleikum til raforkunýtingar enda jafngildir sú orka sem nýtt er hjá hitaveitum í dag 600 MW að meðaltali og á álagstímum að vetralagi allt að 1000MW eða fast að tveimur Kárahnúkavirkjunum. Hitaveitan hefur því ekki eingöngu haft í för með sér bætt lífsgæði, heldur jafnframt séð þjóðinni fyrir ódýrri húshitun, sparað gríðarlegar fjárhæðir í erlendum gjaldeyri og verið vettvangur þekkingaruppbyggingar sem nú er forsenda útrásarverkefna víða um heim. Aldarafmælis minnstSamorka minnist 100 ára afmælisins með ýmsu móti á þessu ári. Má þar nefna gerð heimildamyndar fyrir sjónvarp, uppsetningu útilistaverks í samstarfi við bæjarstjórn Mosfellsbæjar, samantekt Háskólans á Akureyri um heilsufarsáhrif heitavatnsnotkunar á Íslandi, fjölþjóðlega ráðstefnu í samstarfi við Háskóla Íslands og Nordic Energy Research, að ógleymdri útgáfu þessa blaðs. Þá gaf Íslandspóstur út frímerki í tilefni 100 ára afmælisins í maí síðastliðnum. Einstakar hitaveitur hafa einnig minnst þessara tímamóta með ýmsum hætti. Á 100 ára afmælinu minnum við á þau lífsgæði sem hitaveitunum fylgja, horfum með þakklæti aftur til frumkvöðla hitaveituvæðingar og veltum fyrir okkur framtíðaráskorunum á borð við hitaveituvæðingu á svokölluðum köldum svæðum. Franz Árnason
12. september 2008 Samorka og úrskurður umhverfisráðherra Grein Gústafs Adolfs Skúlasonar í Morgunblaðinu: Umhverfisráðherra fjallar í Morgunblaðsgrein um ályktun stjórnar Samorku vegna úrskurðar ráðherrans um sameiginlegt umhverfismat vegna virkjana, háspennulína og álvers á Norðausturlandi. Í ályktuninni er meðal annars vakin athygli á að úrskurðurinn geti haft í för með sér að minnsta kosti eins árs tafir á framkvæmdum og valdið orkufyrirtækjum og viðkomandi sveitarfélögum aukakostnaði sem nemi hundruðum milljóna króna. Skorað er á stjórnvöld að endurskoða ákvörðun sína, enda úrskurðurinn afar íþyngjandi. Úrskurður ráðherra byggir á heimildarákvæði í lögum, ekki skýrum lagafyrirmælum. Umhverfisráðherra segir tvennt undra sig í ályktun Samorku. Annars vegar að samtökin „skuli ekki styðja þá ákvörðun stjórnvalda að gera það sem í þeirra valdi stendur til að tryggja lágmörkun umhverfisáhrifa framkvæmda vegna álvers á Bakka.“ Samorka gerir að sjálfsögðu engar athugasemdir við að reynt sé að lágmarka umhverfisáhrif af byggingu álvers á Bakka. Samorka gerir hins vegar athugasemdir við að orkufyrirtækin fái ekki að framfylgja þeirri yfirlýstu stefnu sinni að rannsaka og undirbúa virkjanir og háspennulínur óháð því hver kemur á endanum til með að kaupa orkuna. Engan veginn er sjálfgefið að tengja fyrirhugaðar virkjanaframkvæmdir á Norðausturlandi við áætlanir um byggingu álvers á Bakka. Þá aðskilja tugir kílómetra umrædd framkvæmdasvæði. Athygli vekur hins vegar að framkvæmdir sem beinlínis tengjast fyrirhuguðu álveri á Bakka, til dæmis hafnarframkvæmdir, eru ekki hluti af þessum úrskurði um sameiginlegt matsferli. Hafa verður í huga að rannsóknir og undirbúningur vegna virkjanaframkvæmda og orkuflutnings taka miklum mun lengri tíma en undirbúningur og bygging til dæmis verksmiðju eða netþjónabús. Yfirlýsingu fagnaðHitt sem undrar ráðherrann er að Samorka skuli álykta með þessum hætti „þegar fulltrúar þeirra í samráðsferlinu vissu fullvel að lausn var í sjónmáli sem tryggir allt í senn, hagsmuni náttúrunnar, hagsmuni almennings og hagsmuni fyrirtækjanna sem í hlut eiga.“ Nú ber sannarlega að fagna því ef slík lausn er í sjónmáli. Þegar stjórn Samorku samþykkti sína ályktun höfðu viðræður farið fram en þær höfðu ekki skilað ásættanlegri niðurstöðu. Þegar þetta er ritað eru umrædd fyrirtæki enn ekki sannfærð um að búið sé að finna ásættanlega niðurstöðu. Sem fyrr segir þá fagnar Samorka hins vegar öllum yfirlýsingum ráðherra um lausn á þessu máli, enda miklir hagsmunir í húfi.
9. september 2008 Ráðstefna um orkugjafa framtíðar í samgöngum, 18.-19. september á Hilton Nordica Dagana 18. og 19. september heldur Framtíðarorka ráðstefnuna Driving Sustainability öðru sinni í Reykjavík, á Hilton Hótel Nordica. Á ráðstefnunni munu m.a. fulltrúar bílaframleiðendanna Toyota, Ford og Mitsubishi veita innsýn í tæknilausnir sem miða að sjálfbærum samgöngum og standa munu neytendum til boða á næstu árum. Stærstu orkufyrirtæki Norðurlanda, Vattenfall í Svíþjóð og Dong Energy í Danmörku, munu skýra ráðstefnugestum frá áætlunum sínum um rafmagnsvæðingu í samgöngum. Sjá nánar á vef ráðstefnunnar.
4. september 2008 Ályktun stjórnar Samorku vegna úrskurðar umhverfisráðherra Ályktun stjórnar Samorku vegna úrskurðar umhverfisráðherra um sameiginlegtumhverfismat vegna virkjana, háspennulína og álvers á Norðausturlandi Á stjórnarfundi Samorku í dag, 4. september, var til umfjöllunar úrskurður umhverfisráðherra frá 31. júlí síðastliðnum um að umhverfisáhrif álvers á Bakka við Húsavík, Þeistareykjavirkjunar, Kröfluvirkjunar II og háspennulína frá Kröflu og Þeistareykjum til Húsavíkur skulu metin sameiginlega samkvæmt 2. mgr. 5. gr. laga um mat á umhverfisáhrifum nr. 106/2000, sbr. 5. gr. laga nr. 75/2005. Með úrskurði ráðherra er felld úr gildi ákvörðun Skipulagsstofnunar frá 13. febrúar 2008 um að ekki sé þörf á sameiginlegu mati á umhverfisáhrifum áðurnefndra framkvæmda. Orkufyrirtækin hafa undanfarin ár unnið að undirbúningi virkjana og háspennulína á Norðausturlandi í góðri samvinnu við Skipulagsstofnun og heimamenn. Minna má á í því sambandi að staðfest svæðisskipulag er fyrir hendi þar sem afmörkuð eru orkuvinnslusvæði og háspennulínuleiðir. Svæðisskipulagið hefur farið í gegnum umhverfismat áætlana í samræmi við lög nr. 105/2006 og verið staðfest af umhverfisráðherra. Stjórn Samorku telur að ráðherra hafi kveðið upp afar íþyngjandi úrskurð, sem byggist á heimildarákvæði í lögum en ekki skýrum lagafyrirmælum. Úrskurðurinn tengir saman framkvæmdir fjögurra lögaðila á svæðum sem eru í tuga kílómetra fjarlægð frá hvort öðru. Það er einnig yfirlýst stefna orkufyrirtækjanna að rannsaka og undirbúa virkjanir og háspennulínur óháð því hver kemur til með á endanum að kaupa orkuna. Hafa verður í huga að það tekur mörg ár, jafnvel áratugi, að rannsaka og undirbúa virkjanir og orkuflutning en í flestum tilvikum aðeins örfá ár, jafnvel nokkur misseri, að undirbúa og byggja t.d. verksmiðju eða setja upp netþjónabú. Það er þess vegna óásættanlegt fyrir orkufyrirtækin að geta ekki stundað rannsóknir og undirbúning á eigin forsendum óháð hugsanlegum orkukaupanda. Standi úrskurðurinn óhaggaður, og falli rannsóknarboranir undir hann, mun það hafa verulegar tafir í för með sér við undirbúning verkefna á Norðausturlandi, um sem nemur a.m.k. einu ári, og valda orkufyrirtækjunum og sveitarfélögunum aukakostnaði er nemur hundruðum milljóna króna. Stjórn Samorku skorar á stjórnvöld að endurskoða ákvörðun sína til að lágmarka þann skaða sem að óbreyttu gæti hlotist af úrskurðinum. Náist ekki ásættanleg niðurstaða í þeim efnum telur stjórn Samorku nauðsynlegt, með hliðsjón af alvarleika málsins, að dómstólar verði látnir skera úr um lögmæti úrskurðar ráðherra, vegna framtíðarhagsmuna orkuiðnaðarins.
2. september 2008 100 ára afmælisdagskrá á alþjóðlegri ráðstefnu um hitaveitur Þriðjudaginn 2. september stóð Samorka fyrir dagskrá í tilefni af 100 ára afmæli hitaveitu á Íslandi, innan ramma alþjóðlegu ráðstefnunnar 11th International Symposium on District Heating and Cooling. Háskóli Íslands skipulagði ráðstefnuna í samstarfi við Samorku og Nordic Energy Research, og var hún haldin á Háskólatorgi dagana 1.-2. september (auk skoðunarferðar sunnudaginn 31. ágúst, þar sem m.a. var komið við í Hellisheiðarvirkjun). Opnun iðnaðarráðherra Össur Skarphéðinsson iðnaðarráðherra opnaði afmælisdagskránna. Fjallaði hann um þessa 100 ára þekktu sögu, en jafnframt um 800 ára langa sögu ef talin væri með jarðhitanýting Snorra Sturlusonar! Össur fjallaði vítt og breytt um íslensk orkumál, mikilvægi jarðhitaveitunnar, þekkingu Íslendinga á nýtingu jarðhita, tækifæri í útrás, djúpborunarverkefnið og margt fleira. Að loknu opnunarávarpi iðnaðarráðherra tóku við fjögur erindi, sem nálgast mér hér að neðan, en dagskráin fór fram á ensku. On Geothermal Energy in Iceland Ólafur G. Flóvenz, General Director, ÍSOR – Iceland Geosurvey 100 Years of Geothermal Space Heating Sveinn Þórðarson, historian Geothermal Space Heating in Iceland – Closing the Circle Haukur Jóhannesson, Chief Geologist, ÍSOR – Iceland Geosurvey The Icelandic Deep Drilling Project Guðmundur Ómar Friðleifsson, Chief Geologist, representing IDDP
21. ágúst 2008 Afmælisdagskrá hitaveitu á alþjóðlegri ráðstefnu, þriðjudaginn 2. september Samorka skipuleggur sérstaka afmælisdagskrá í tilefni af 100 ára afmæli hitaveitu á Íslandi, á alþjóðlegu ráðstefnunni 11th International Symposium on Central Heating and Cooling í Reykjavík. Ráðstefnan stendur yfir dagana 31. ágúst til 2. september, en afmælisdagskrá verður þriðjudaginn 2. september kl. 13:20 – 15:00. Ráðstefnan fer öll fram á ensku og ráðstefnugjald er kr. 55.000, en ókeypis er inn á afmælisdagskránna og allir velkomnir. Össur Skarphéðinsson iðnaðarráðherra opnar afmælisdagskrá Samorku en síðan mun Ólafur G. Flóvenz, forstjóri ÍSOR, fjalla um jarðhita á Íslandi; Sveinn Þórðarson sagnfræðingur mun fjalla um 100 ára sögu hitaveitunnar; Haukur Jóhannesson, fagsviðsstjóri á ÍSOR, fjallar um jarðhitaleit; og loks mun Guðmundur Ómar Friðleifsson fjalla um íslenska djúpborunarverkefnið, sem hann hefur starfað að um árabil. Nánari upplýsingar um ráðstefnuna í heild má nálgast hér. Dagskrá afmælisdagskrárinnar má nálgast hér.