Fréttir

Konur viðmælendur í 30% tilfella

Konur eru töluvert sjaldnar viðmælendur en karlar í fréttum ljósvakamiðla um orkumál, eða í aðeins 30% tilfella. Þetta kynjahlutfall er lægra en almennt gerist í fréttum ljósvakamiðla.

Þetta kemur fram í Fjölmiðlalykli fyrir árið 2018, sem félagið Konur í orkumálum hefur birt og sýnir tölfræði um kynjaskiptingu viðmælenda í fréttum ljósvakamiðla um orkumál á árinu 2018. Gögnin eru unnin upp úr greiningu Fjölmiðlavaktar Creditinfo.

Nokkur munur reyndist á kynjaskiptingu viðmælenda fyrri hluta árs og síðari hluta árs. Skýringin liggur í tvöföldun á fréttum sem tengjast Orku náttúrunnar á haustmánuðum og fjölgun kvenviðmælenda vegna málsins.

Harpa Þórunn Pétursdóttir, formaður Kvenna í orkumálum, segir mikilvægt að varpa ljósi á þessa tölfræði því hún endurspegli ásýnd geirans, hverjir eru talsmenn orkumála og fyrirmyndir.

„Það er mikilvægt að við séum öll meðvituð um þessi ójöfnu hlutföll þar sem verulega hallar á kvenviðmælendur og því er hér verk að vinna við að rétta þessa stöðu af.“ segir Harpa.

Stefnt er að því að gefa Fjölmiðlalykil KíO reglulega og fylgjast þannig með þróuninni.

Fjölmiðlalykill KÍO 2018Download

Konur í orkumálum er félag kvenna í orkugeiranum og eru félagskonur- og menn úr aðildarfélögum Samorku en einnig öðrum fyrirtækjum og stofnunum svo sem háskólaumhverfinu, rannsóknarstofnunum og ráðgjafastofum af ýmsum toga.

Fyrirlesarar óskast á alþjóðlega hitaveituráðstefnu

Dagana 23. – 25. október 2019 verður alþjóðlega hitaveituráðstefnan „Sustainble District Energy Conference“ haldin í Reykjavík. Ráðstefnan fer fram í fyrsta skipti hér á landi en tilgangur hennar er að vera samstarfsvettvangur Evrópuþjóða í rannsóknum og þróun á endurnýjanlegum orkugjöfum. Samorka, samtök orku- og veitufyrirtækja á Íslandi heldur ráðstefnuna í samstarfi við íslenska orkuklasann.

Óskað er eftir áhugaverðum fyrirlestrum á ráðstefnuna og opnað hefur verið fyrir tillögur á heimasíðu ráðstefnunnar, sdec.is. Í boði eru fjölbreytt umfjöllunarefni og mega erindin vera bæði um efni vísindalegra greina eða rannsókna, sem og byggð á reynslu fyrirlesarans. Frestur til að skila inn tillögu að erindi er 1. apríl 2019. Erindin verða flutt á ensku á ráðstefnunni.

Samhliða ráðstefnunni verða verðlaunin „Global District Energy climate Awards“ veitt í sjötta skipti. Verðlaunin eru veitt þeim sem þykja skara framúr í vinnslu og nýtingu á endurnýjanlegri orku. Það eru samtökin „Euroheat & Power“ og „EGEC (European Geothermal Energy Concil)“ sem standa að verðlaununum en bæði samtökin hafa það að markmiði að auka samkeppnishæfni endurnýjanlegra orkugjafa.

Orkustefna mikilvæg fyrir alla

Orkustefna í mótun var umfjöllunarefni ársfundar Samorku sem haldinn var miðvikudaginn 6. mars á Grand hótel í Reykjavík.

Myndband Samorku um þær spurningar sem orkustefna þarf að taka á

Guðrún Sævarsdóttir, formaður starfshóps stjórnvalda um mótun orkustefnu fyrir Ísland, Páll Erland, framkvæmdastjóri Samorku og Toril Johanne Svaan, deildarstjóri í norska orkumálaráðuneytinu, fluttu erindi og fjölluðu meðal annars um þeirra hluta sem orkustefnu er ætlað að taka mið af, hvaða spurningum orkustefna þarf að svara og reynslu Noregs af mótun sinnar orkustefnu.

Þórdís Kolbrún Reykfjörð Gylfadóttir, ráðherra ferðamála-, iðnaðar- og nýsköpunar, ávarpaði fundargesti sem og Helgi Jóhannesson, formaður stjórnar Samorku.

Guðrún Sævarsdóttir sagði frá vinnu starfshóps um mótun orkustefnu og hvert upplegg hans væri frá stjórnvöldum.

Í erindi Guðrúnar kom meðal annars fram að orkustefnu væri meðal annars uppálagt að styðja við orkuskipti í samgöngum og önnur loftslagsmarkmið Íslands.

Páll Erland, framkvæmdastjóri Samorku, ræddi um mikilvægi þess að áherslur orkustefnu væru skýrar og þjóðinni kunnar. Nefndi hann meðal annars orkuöryggi þjóðarinnar, samkeppnishæfni og loftslagsmál sem orkustefna þyrfti að taka á og tryggja þyrfti samfélaginu öllu ávinninginn af orku- og auðlindanýtingu.

„Markmið orkufyrirtækjanna er ekki að virkja sem allra mest, heldur að uppfylla þarfir þjóðarinnar“ sagði Páll meðal annars í erindi sínu.

Toril Svaan deildi reynslu Norðmanna af mótun orkustefnu, hvaða þátta þeir hafi litið til við gerð hennar og helstu áherslna.

Toril Svaan sagði frá reynslu Norðmanna við mótun orkustefnu þar í landi

Í ávarpi sínu sagði Þórdís Kolbrún, ráðherra, meðal annars lengi hafa verið kallað eftir mótun heildstæðrar orkustefnu og gerð hennar væri líklega það mikilvægasta sem við stæðum frammi fyrir á sviði orkumála og auðlindanýtingar almennt.

Ávarp Þórdísar Kolbrúnar, ráðherra ferðamála-, iðnaðar- og nýsköpunar

Helgi Jóhannesson, formaður stjórnar Samorku sagði í opnunarávarpi að orkustefna yrði að vera leiðarljós inn í framtíðina.

Húsfyllir var á fundinum, enda um mikilvægt umræðuefni að ræða þar sem orkustefna verður leiðarljós í orkumálum landsins inn í framtíðina. Hér má sjá myndir frá fundinum.

Helgi endurkjörinn formaður

Helgi Jóhannesson, forstjóri Norðurorku, var í dag endurkjörinn formaður stjórnar Samorku á aðalfundi samtakanna, sem haldinn var á Grand hótel Reykjavík. Þá var Ásgeir Margeirsson, forstjóri HS Orku, einnig endurkjörinn í stjórn samtakanna til tveggja ára.

Berglind Rán Ólafsdóttir, framkvæmdastjóri Orku náttúrunnar, var kosin í stjórn Samorku í fyrsta sinn. Berglind var kjörin til tveggja ára.

Í stjórn sitja jafnframt áfram þau Guðmundur Ingi Ásmundsson, forstjóri Landsnets, Inga Dóra Hrólfsdóttir, framkvæmdastjóri Veitna, Jóhanna B. Hansen, bæjarverkfræðingur Mosfellsbæjar og Ragna Árnadóttir aðstoðarforstjóri Landsvirkjunar.

Harpa Þuríður Böðvarsdóttir, Veitum og Indriði Þór Einarsson, Skagafjarðarveitum koma ný inn sem varamenn í stjórn Samorku. Áfram sitja sem varamenn þau Elías Jónatansson, Orkubúi Vestfjarða, Guðbjörg Marteinsdóttir, RARIK og Hörður Arnarson, Landsvirkjun.

Konur skipa áfram meirihluta aðalmanna stjórnar Samorku. Að varamönnum meðtöldum er jafnt hlutfall kynja.

Stjórn Samorku, að loknum aðalfundi 2019, skipa:

Aðalmenn:
Ásgeir Margeirsson, HS Orku
Berglind Rán Ólafsdóttir, Orku náttúrunnar
Guðmundur Ingi Ásmundsson, Landsneti
Helgi Jóhannesson, Norðurorku, formaður stjórnar
Inga Dóra Hrólfsdóttir, Veitum
Jóhanna B. Hansen, Mosfellsbæ
Ragna Árnadóttir, Landsvirkjun

Varamenn:
Elías Jónatansson, Orkubúi Vestfjarða
Guðbjörg Marteinsdóttir, RARIK
Harpa Þuríður Böðvarsdóttir, Veitum
Hörður Arnarson, Landsvirkjun,
Indriði Þór Einarsson, Skagafjarðarveitum

Berglind Rán Ólafsdóttir ráðin framkvæmdastjóri ON

Stjórn Orku náttúrunnar (ON) hefur ráðið Berglindi Rán Ólafsdóttur framkvæmdastjóra fyrirtækisins. Berglind hefur gengt starfinu tímabundið frá því í september síðastliðnum en það var auglýst laust til umsóknar í byrjun þessa árs.
Berglind er sameindalíffræðingur með MBA próf frá IESE í Barcelona. Hún var ráðin til Orku náttúrunnar á árinu 2017 sem forstöðumaður fyrirtækjamarkaða og hafði þá meira en áratugarreynslu af viðskiptaþróun meðal annars hjá Landsvirkjun, Medis og Íslenskri erfðagreiningu.

Orka náttúrunnar er stærsta orkufyrirtæki landsins á sviði jarðvarma og vinnur rafmagn og heitt vatn í virkjunum á Nesjavöllum og Hellisheiði auk raforkuvinnslu í Andakílsárvirkjun. ON er þjónustufyrirtæki með viðskiptavini um allt land og býður heimilum og fyrirtækjum eingöngu upp á vottaða endurnýjanlegra orku.

Fyrirtækið er leiðandi í uppbyggingu innviða fyrir orkuskipti í samgöngum hér á landi og rekur 50 hlöður fyrir rafbílaeigendur um allt land. Árleg velta fyrirtækisins nemur um 20 milljörðum króna og starfsfólk er liðlega 80 talsins. Formaður stjórnar ON er Hildigunnur H. Thorsteinsson, verkfræðingur og framkvæmdastjóri þróunarsviðs Orkuveitu Reykjavíkur.

BEIN ÚTSENDING: Orkustefna í mótun

Opinn ársfundur Samorku verður haldinn 6. mars kl. 15 í Háteig á Grand hótel Reykjavík.

Á fundinum verður orkustefna fyrir Ísland til umfjöllunar. Hverjar verða áherslur Íslands til framtíðar í orkumálum?

Dagskrá:

Ávarp – Helgi Jóhannesson, formaður Samorku
Ávarp – Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra
Mótun orkustefnu Íslands – Guðrún Sævarsdóttir, formaður starfshóps stjórnvalda um gerð orkustefnu
Mikilvægi orkustefnu  – Páll Erland, framkvæmdastjóri Samorku
Creating Energy Policy: Experience from Norway – Toril Johanne Svaan, deildarstjóri í orkumálaráðuneyti Noregs
 
Fundarstjóri: Guðrún Erla Jónsdóttir, stefnustjóri Orkuveitu Reykjavíkur

Í lok fundar verður boðið upp á léttar veitingar. Allir velkomnir, skráningar er óskað hér fyrir neðan.

Fyrr um daginn verður aðalfundur Samorku sem ætlaður er aðildarfélögum Samorku. Um hefðbundin aðalfundarstörf er að ræða.


    Ég mæti á aðalfund kl. 13 (fyrir aðildarfélög)
    Ég mæti á opinn ársfund kl. 15

    Landsvirkjun fær jafnlaunavottun

    Frá afhendingu jafnlaunaskírteinisins

    Landsvirkjun hefur fengið vottun á jafnlaunakerfi fyrirtækisins. Því til staðfestingar hefur fyrirtækið fengið afhent skírteini frá vottunar- og faggildarstofunni BSI á Íslandi og einnig jafnlaunamerki Velferðarráðuneytisins frá Jafnréttisstofu.

    Jafnlaunakerfið stuðlar að því að starfsmenn njóti jafnra launa fyrir jafnverðmæt störf. Starfsumhverfi og hlutverk Landsvirkjunar krefst fjölbreyttra starfa og er bakgrunnur starfsfólks mismunandi hvað varðar menntun, hæfni og reynslu. Jafnlaunakerfi fyrirtækisins endurspeglar þessa fjölbreytni og styður við fagleg vinnubrögð sem fyrirbyggja hvers konar mismunun hvað varðar kjör starfsfólks.

    Unnið var að innleiðingu kerfisins á árinu 2018 í samvinnu við PwC og var kerfið tekið út af BSI í byrjun desember. Einnig hafði Landsvirkjun fengið gullmerki Jafnlaunaúttektar PwC fyrir árið 2018, en hafði áður fengið gullmerkið 2013, 2015 og 2017.

    Viðbúnaður Veitna vegna kuldakasts

    Veitur hafa virkjað viðbragðsáætlun í rekstri hitaveitunnar vegna kuldakastsins sem nú stendur yfir á höfuðborgarsvæðinu.

    Rennsli í hitaveitukerfi Veitna á höfuðborgarsvæðinu hélt áfram að aukast í nótt eftir metrennsli í gær. Jafnaðarrennslið nemur um 16.400 rúmmetrum þá klukkutíma sem notkunin er mest. Megin skýringin er aukin kynding húsa og varmatap úr þeim vegna kuldans.

    Spáð er áframhaldandi frosti næstu daga og vegna þessa hafa Veitur virkjað viðbragðsáætlun sína. Gangi veðurspáin eftir gæti komið til skerðinga á afhendingu á heitu vatni til stærri notenda á föstudag, á meðal þeirra eru sundlaugarnar.

    Förum vel með heita vatnið
    Veitur hvöttu fólk í gær til að fara vel með heita vatnið og huga að því hvort hugsanlega sé vatni sóað á heimilum þess eða vinnustöðum. Um 90% af hitaveituvatninu eru notuð til húshitunar. Fólk getur sparað heitt vatn og þar með kyndikostnað sinn með því að gæta að því að gluggar séu ekki opnir og útidyr ekki látnar standa opnar lengur en þörf er á. Þá skipta einnig máli stillingar ofna – að óþarflega heitt vatn renni ekki frá þeim – og að ofnarnir séu ekki byrgðir, til dæmis með síðum gluggatjöldum eða húsgögnum. Þá eru heitir pottar við heimili talsvert þurftafrekir á vatnið. Fleiri sparnaðarráð er að finna á vef Veitna.

    Stækkuð varmastöð í haust
    Uppbygging stendur yfir í hitaveitu Veitna á höfuðborgarsvæðinu. Talsverð aukning varð á notkun á heitu vatni á höfuðborgarsvæðinu á árinu 2018. Árið var mun kaldara en árin á undan, fólksfjölgun var mikil og mikið byggt af húsnæði. Aukning notkunar á heitu vatni var þó umfram það sem þessu svaraði. Á meðal yfirstandandi fjárfestinga Veitna er tenging eldri borhola við hitaveituna, sverun aðalæða en mestu mun skipta stækkun varmastöðvar í Hellisheiðarvirkjun. Hún var upphaflega ráðgerð árið 2023 en var flýtt til haustsins 2019. Gangi langtímaspár um heitavatnsnotkun eftir duga þessar aðgerðir fram undir miðjan næsta ártug. Spár Veitna í þessum efnum eru endurskoðaðar tvisvar á ári.

    Hugmyndasamkeppni um sýningu í Elliðaárstöð

    t.v. geymsluskúr, næst er háspennulínan til Vífilstaða, hús stöðvarstjóra og rafstöðvarhúsið. Vel sést þar sem háspennulínann til Reykjavíkur liggur í tvístæðum við stöðvarhúsið.

    Orkuveita Reykjavíkur efnir í samstarfi við Hönnunarmiðstöð Íslands til hugmynda-samkeppni um sögu- og tæknisýningu í Elliðaárstöð og nánasta umhverfi. Miðað er við að rafstöðin, stöðvarstjórahús og annar húsakostur fyrirtækisins í dalnum nýtist sem hluti af sýningunni.

    Elliðaárdalurinn er vagga veitureksturs í Reykjavík og á síðari áratugum eitt vinsælasta útivistarsvæði höfuðborgarbúa. Vatn var fyrst tekið úr Elliðaánum í vatnsveituna sumarið 1909 og síðar það ár úr Gvendarbrunnum við Elliðavatn. Sumarið 1921 var rafstöðin við Elliðaár tekin í notkun og 1951 hóf veitustarfsfólk skógrækt í dalnum. Fyrsta heitavatnsholan í Elliðaárdal var boruð 1967 og hefur hitaveitan nýtt borholur í dalnum frá þeim tíma. Þá er ónefnd laxveiðin sem stendur djúpum rótum í dalnum.

    Markmið samkeppninnar er að kalla fram áhugaverðir hugmyndir um hvernig miðla megi fróðleik um þetta einstaka útivistarsvæði og auka og greiða aðgengi fjölskyldna og annarra borgarbúa að þessum almannaeigum.

    Frestur til að skila inn umsókn um þátttöku í forvali er til kl. 16.00 fimmtudaginn 14. febrúar 2019 en tilkynnt verður hverjir veljast til þátttöku í lokuðu samkeppninni viku síðar, fimmtudaginn 21. febrúar 2019. OR mun greiða hverju teymi sem velst til þátttöku í samkeppninni kr. 1.000.000 fyrir tillöguna, að því gefnu að hún sé fullnægjandi samkvæmt keppnislýsingu og uppfylli skilyrði um afhendingu og skilaform.

    Nánari upplýsingar um hugmyndasamkeppnina, áherslur dómnefndar og fleira má sjá á vef OR.

     

     

    Á morgun, laugardaginn 26. janúar, verður opið hús í rafstöðinni á milli klukkan 13 og 16. Örleiðsögn um stöðina og rafmagn í Reykjavík verður á heila og hálfa tímanum. Í húsnæði Hins hússins, hinum megin við Rafstöðvarveginn, verður Vísindasmiðja Háskólalestarinnar með rafmagnstengdar tilraunir, tæki, þrautir og óvæntar uppgötvanir sem allir aldurshópar geta haft gaman að.

    Dreifing sólarorkulampa heldur áfram

     

    Í dag, 23. janúar, er degi rafmagnsins fagnað á Norðurlöndunum.

    Rafmagn er sjálfsagt og aðgengilegt í daglegu lífi okkar Íslendinga, svo það er auðvelt að gleyma því að um það bil 1,3 milljarður manna býr við takmarkað aðgengi að því í heiminum.

    Í tilefni af degi rafmagnsins hefur Samorku tvö ár í röð staðið fyrir fjármögnun og dreifingu sólarorkulampa í Afríku í samvinnu við sænska fyrirtækið Givewatts. Markmið Givewatts er að gefa fjölskyldum í Kenýa og Tansaníu kost á því að fjárfesta í hreinni og ódýrri orku í formi sólarorkulampa í stað steinolíulampa við leik og störf.

    Samorka hefur nú fjármagnað alls 320 lampa, sem munu bæta lífsgæði um 1.600 manns, þar sem að meðaltali nýta fimm einstaklingar sér hvern lampa á hverju heimili.

    Hér má sjá nýtt myndband frá Givewatts um áhrif sólarorkulampa á fjölskyldulífið á svæðum þar sem aðgengi að lýsingu á heimili er takmarkað.

    Impact: Family time from GIVEWATTS on Vimeo.

     

    Starfsmaður Givewatts heimsækir skóla í Vihiga

    Lamparnir frá Samorku eru í dreifingu í þorpinu Vihiga í Kenýa og Mwanza í Tansaníu. Eins og sjá má hefur dreifing lampanna gengið hægar en vonast var eftir, þar sem efnahagsástandið á svæðunum var ekki gott á síðari hluta ársins 2018 vegna slæmrar uppskeru, en vonast er til þess að hún taki kipp á nýju ári. Givewatts hefur ráðið í stöðu sölustjóra og almennan starfsmann yfir Vihiga svæðinu í Kenýa, sem er nýtt svæði hjá þeim. Þá eru fleiri starfsmenn í þjálfun og fræðslu, svo hægt sé að efla kynningu á lömpunum og kostum endurnýjanlegrar orku í stað steinolíulampa. Þannig er vonast til að dreifing lampanna komist á skrið að nýju.

     

     

    Hér má lesa frekari upplýsingar um fjármögnun lampanna á degi rafmagnsins 2017 og 2018.